जुम्लामा बन्चरो प्रहारबाट एक महिलाको हत्या गरिएको छ । कनकासुन्दरी गाउँपालिका–३ ओखरपाटकी अन्दाजी ३५ वर्षकी अमृता बुढाको हत्या गरिएको प्रहरीले जनाएको हो ।

जिल्ला प्रहरी कार्यालय जुम्लाका प्रहरी निरीक्षक उमेश चन्दका अनुसार प्रारम्भिक जानकारीअनुसार सोही वडाकै श्यामबहादुर बुढाले बन्चरो प्रहार गरी ती महिलाको शुक्रवार साढे १२ बजे हत्या गरिएको छ । प्रहरीका अनुसार उक्त घटना भएपछि घटनास्थलतिर जिल्ला प्रहरी कार्यालय जुम्लाबाट पनि प्रहरी पठाइएको छ ।

प्रहरी निरीक्षकका अनुसार बन्चरो प्रहार गरेर हत्या गर्ने व्यक्ति समेतलाई प्रहरीले नियन्त्रणमा लिइसकेको छ । उनका अनुसार प्रहरी घटनास्थलमा गएको छ । प्रहरीले यो घटना गम्भीर रूपमा अनुसन्धान अगाडि बढाउनेछ। प्रहरीलाई जानकारी आएअनुसार ती बन्चरो प्रहार गर्ने गरी हत्या गरिएकी महिला गाउकी भाउजू नाता पर्ने भनिएको छ ।