जुम्लाको तातोपानी गाउँपालिका–४ गिडिखोलाका गाउँका २० वर्षिय विशाल पाण्डे बिहिवार दिउँसो मृत फेला परेका छन् । उक्त वडामा पर्ने गिरिखोला खेतको कुलो (नहरमा)मृत अवस्थामा भेटिएको प्रहरी कार्यालय जुम्लाका सूचना अधिकारी उमेश चन्दले बताए ।

मृतक बिशाल बुधवार दिउँसो घरबाट जुम्ला बजार जान्छु,भनेर निस्केको पारिवारिक स्रोतले जनाएको छ।मृतक विशाल धर्मराज पाण्डेका छोरा हुन् ।

विहान सम्म घर नफर्केपछि खोजतलास गरिएको हो । खोजीकार्य गर्ने क्रममा मृतक पाण्डेका ससुरा परेकराज आचार्यले फेला पारेपछि हाकुँ प्रहरीलाई खवर गरेका थिए । मृत फेला परेको सूचना पाउनासाथ तातोपानी गाउँपालिकामा अवस्थित प्रहरी चौकी हाकुबाट प्रसनि छोवाङ लामाको कमाण्डमा पाँच जनाको टोली त्यहाँ पुगेको थियोे।

उनले भने, ‘जिल्लाबाट प्रहरी निरिक्षक यामबहादुर बुढामगरको कमाण्डमा ६ जनाको टोली उक्त ठाउँमा पुगेको थियोे ।’ लास पोष्टमाटमका लागि जुम्लाको स्वास्थ्य विज्ञान प्रतिष्ठानमा राखिएको प्रहरीले जनाएको छ ।