लुम्बिनी प्रदेश सरकारले स्थानीय उत्पादन बढाउन साना तथा घरेलु उद्योगलाई प्रवर्धन गर्ने नीतिलाई प्राथमिकतामा राखेको छ । स्थानीय वन, जङ्गलमा पाइने कच्चा पदार्थलाई नेपाली कागज बनाउन सदुपयोग गर्न सकिने र त्यसलाई प्रदेश सरकारले प्रवर्धन गर्ने मुख्यमन्त्री चेतनारायण आचार्यले बताए ।

दाङ जिल्लाको राप्ती गाउँपालिका–४ पिरखुट्टी निवासी उद्यमी डम्बरबहादुर जिसी र राप्ती गाउँपालिकाका जनप्रतिनिधिसँगको भेटमा मुख्यमन्त्री आचार्यले स्थानीय उत्पादन बढाउन साना तथा घरेलु उद्योगलाई प्रवर्धन गरिने बताएका हुन ।

सरकारले पनि स्थानीय उत्पादन बढाउने गरी नीति तथा कार्यक्रम बनाएको समेत उनले बताए । भेटमा उद्यमी जिसीले नेपाली हाते कागज कारखाना स्थापना गरेको, वार्षिक एक करोड बढीको कारोबार गरिरहेको, २० जनालाई प्रत्यक्ष रोजगारी दिएको मुख्यमन्त्री आचार्यलाई जानकारी गराएका थिए ।

स्थानीय स्तरमा उत्पादन भएको नेपाली कागजलाई सरकारी कामकाजको प्रयोगमा ल्याउन उद्यमी जिसीले अनुरोध गरे । स्थानीय स्तरमा उत्पादन भएको नेपाली कागजलाई प्रदेश सरकारले सरकारी कामकाजमा प्रयोगमा ल्याउँदा उद्योगीलाई पनि हौसला थपिने जिसीले बताए ।

उत्पादन भएको नेपाली कागज देशका ठुला सहरमा पुगेको, नेपाली कागज उत्पादन गर्न भ्याई नभ्याई भएको उद्यमीहरूको भनाई छ ।

परिवारका सदस्यले सुरु गरेको घरेलु उद्योगबाट उत्पादन भएको कागजले राम्रो बजार पाइरहेको जिसीले बताए । अब उद्योगलाई स्तरबृद्धि गरेर थप २० जनालाई रोजगारी सृजना गर्ने लक्ष्य रहेको समेत उनको भनाई छ । जिसीको परिवारले २०७९ फागुन १९ गतेबाट ४५ लाखको लगानीमा ‘राप्ती नेपाली हाते कागज कारखाना’ स्थापना गरेर नेपाली कागज उत्पादन गर्दै आएको छ ।