सरला सुवेदी ।
अत्यधिक चिसो बढ्दै गएपछि बाँकेको कोहलपुर नगरपालिकाले विद्यालयहरूमा जाडो बिदा दिने निर्णय गरेको छ । नगरपालिकाका सामुदायिक तथा संस्थागत विद्यालयका पेशागत घटकहरूसँग बसेको बैठकले यो निर्णय गरेको हो । शिक्षा शाखाका अनुसार पुस २६ गतेदेखि २९ गतेसम्म नगरक्षेत्रका सबै विद्यालय बन्द रहनेछन् ।

बैठकले चिसोका कारण विद्यार्थीहरूको स्वास्थ्यमा असर पर्न सक्ने भएकाले विद्यालय बन्द गर्नु उपयुक्त ठहर गरेको हो । यस अवधिमा पुस २५ गते विद्यालयहरूले बालबालिकालाई गृहकार्य उपलब्ध गराउने र चिसोबाट सुरक्षित रहन आवश्यक जानकारी दिने व्यवस्था गर्नुपर्ने निर्णय समेत गरिएको छ ।

बैठकले जाडो बिदाका साथै परीक्षा सञ्चालन भैरहेका विद्यालयहरूलाई बालबालिकाको स्वास्थ्य सुरक्षालाई प्राथमिकतामा राखी आवश्यक व्यवस्थापन गर्न अनुमति दिएको छ । यस्तै, स्पोट्र्स डे सञ्चालन गरिरहेका विद्यालयहरूले पनि बालबालिकाको स्वास्थ्यलाई ख्याल गर्दै कार्यक्रम अघि बढाउन सक्नेछन् ।

नगरपालिकाले बालबालिकाको स्वास्थ्य र सुरक्षालाई ध्यानमा राख्दै अभिभावक र शिक्षकहरूलाई सचेत रहन आग्रह गरेको छ । नगर क्षेत्रका धेरै ठाउँमा चिसो अत्यधिक बढेकोले बालबालिकाको स्वास्थ्यमा असर पर्ने सम्भावना रहेको शिक्षा शाखाले जनाएको छ ।

चिसोका कारण विशेषगरी बिहान र साँझ विद्यालय आउजाउ गर्ने क्रममा विद्यार्थीहरूले समस्या भोग्नु परेको थियो । यसैलाई ध्यानमा राख्दै विद्यालय बिदा दिने निर्णय गरिएको हो । नगरपालिकाले यो अवधिमा बालबालिकालाई न्यानो लुगा लगाउन र आवश्यक सर्तकता अपनाउन सुझाव दिएको छ ।

कोहलपुर नगरपालिकाको यो निर्णयले बालबालिका, अभिभावक, र विद्यालयलाई चिसोको प्रभावबाट सुरक्षित राख्न सघाउने विश्वास लिइएको छ । यसअघि पनि चिसोको समयमा नगरपालिकाले यस्ता निर्णय गर्दै आएको थियो ।